parakathe
So xoriomuna olon omorfa esane ta parakathe nt'epiname. Esorefkumunest me ta patside ce t'aguropede entama epeyname s'enan ospiti nt'uc etoneci kaynis asi tranus. epeyname ya ne kaxumunest, n'epezame ce exorevame. I trani pal manaxi uce kaxusane. Ecini pal epeynane s'aletera t'ospite sa parakathe. Ekaxusan ce esintishenan. Katakremizan ton inan ce ton alon. Emis pal eterenam tina egapume ce ograsevam ne menizamatena ecino nto nonizume. So xorema ontan empenam prospathusam (ograsevam) n'empenume so sheri otina agapenam. Ontan empene so sheri muna emis pal espinkam to daxtilonates ya n'egrikay oti agapumatena. Ontan enan patsi egapenemas asi xaramuna ne petaname. Alo uc eporenam ne cimumunest. Alo uc egvenen aso numuna.
S'ospiti pa ontan erxusan episkeptes (musafiri) axarinumunest. Ekaxumunest ce akugame nto legune i trani. Ama i trani ixane enan ashkemo; ecino pal etone oti ontan epeynan sa parakathe uc eperenan ta gardeletuna entama. Epeynan manaxi so porpatema.
Ta parakathe palea esane polla omorfa ama xar kaynis aso spitinat uc egven. Ulin kaxuntane ce terune televizyoni. Ta parakathe pa ekopane. Ya t'ato kaynis uc ekser o alos nt'eftey. Ama ya na katakremiz o enas ton alon sinexizi (eftey devami). Ta telefone ya t'avuto ti duliya dulevune.
Ta televizyone ce ta telefone exorisan t'ospite asa ospite ce ts'anthropus as'anthropus.